СЛУЖБА
СВЯЩЕННОМУЧЕНИКУ АЛЕКСАНДРУ БУРАВЦЕВУ
НА ВЕЛИЦЕЙ ВЕЧЕРНИ
На Господи, воззвах: стихира, глас 5:
СЛОВЕСА ПРЕМУДРА,/ О ЕЖЕ НЕ ЛЕТЫ, НО ДЕЯНЬМИ БЛАГИМИ/ ПОЛНОТА ЖИТИЯ ЧЕЛОВЕЧЕСКАГО ПРЕД БОГОМ ИЗМЕРЯЕТСЯ,/ НА ТЕБЕ ИСПОЛНИШАСЯ, СВЯЩЕННОМУЧЕНИЧЕ АЛЕКСАНДРЕ,/ ТЕМЖЕ ДУШУ ДОБРОДЕТЕЛЬМИ ОБОГАЩЕННУ ИМЕЯ,/ ГОНЕНИЯ И СМЕРТЬ ПРЕТЕРПЕВ,/ В НЕБЕСНЫЯ ОБИТЕЛИ ВСЕЛИЛСЯ ЕСИ,// ИДЕЖЕ МОЛИШИСЯ О НАС ПРИСНО ХРИСТУ.
Премудрости Соломонова чтение (глава 4):
ПРАВЕДНИК, АЩЕ ПОСТИГНЕТ СКОНЧАТИСЯ, В ПОКОИ БУДЕТ./ СТАРОСТЬ БО ЧЕСТНА НЕ МНОГОЛЕТНА, НИЖЕ В ЧИСЛЕ ЛЕТ ИСЧИТАЕТСЯ./ СЕДИНА ЖЕ ЕСТЬ МУДРОСТЬ ЧЕЛОВЕКОМ, И ВОЗРАСТ СТАРОСТИ ЖИТИЕ НЕСКВЕРНОЕ./ БЛАГОУГОДЕН БОГОВИ БЫВ, ВОЗЛЮБЛЕН БЫСТЬ, И ЖИВЫЙ ПОСРЕДЕ ГРЕШНИК ПРЕДСТАВЛЕН БЫСТЬ./ ВОСХИЩЕН БЫСТЬ, ДА НЕ ЗЛОБА ИЗМЕНИТ РАЗУМА ЕГО, ИЛИ ЛЕСТЬ ПРЕЛЬСТИТ ДУШУ ЕГО./ РАЧЕНИЕ БО ЗЛОБЫ ПОМРАЧАЕТ ДОБРАЯ, И ПАРЕНИЕ ПОХОТИ ПРЕМЕНЯЕТ УМ НЕЗЛОБИВ./ СКОНЧАВСЯ ВМАЛЕ, ИСПОЛНИ ЛЕТА ДОЛГА. УГОДНА БО БЕ ГОСПОДЕВИ ДУША ЕГО, СЕГО РАДИ ПОТЩАСЯ ОТ СРЕДЫ ЛУКАВСТВИЯ./ ЛЮДИЕ ЖЕ ВИДЕВШЕ И НЕ РАЗУМЕВШЕ, НИЖЕ ПОЛОЖШЕ В ПОМЫШЛЕНИИ ТАКОВОЕ./ ЯКО БЛАГОДАТЬ И МИЛОСТЬ В ПРЕПОДОБНЫХ ЕГО, И ПОСЕЩЕНИЕ ВО ИЗБРАННЫХ ЕГО.
На литии стихира, глас 3.
ВНИМАЙТЕ УБО СЕБЕ, ЧАДА!/ ПРОБАВИ БО ГОСПОДЬ НЫНЕ МИЛОСТЬ СВОЮ НАМ:/ ПОТОЦЫ КРОВЕ МУЧЕНИК ИЗСЯКОША,/ ПЛЕНЕНИЯ ОТ ВЛАСТИ БЕЗБОЖНЫХ СВОБОДИХОМСЯ,/ ПОПРАННИИ ХРАМЫ БОЖИИ ВОЗСТАВЛЯЮТСЯ/ МОЛИТВАМИ НОВОМУЧЕНИК РОССИЙСКИХ,// ИХЖЕ ПРЕДСТАТЕЛЬСТВОМ ХРИСТЕ СПАСИ ДУШИ НАША.
На стиховне стихира, глас 4:
КРОВЬМИ СВЯТЫХ МУЧЕНИК/ ЦЕРКОВЬ ХРИСТОВА ДРЕВЛЕ УТВЕРДИСЯ,/ ТАКОЖДЕ И ВО ДНИ ТВОЯ, СВЯЩЕННОМУЧЕНИЧЕ АЛЕКСАНДРЕ,/ ВО ОТЕЧЕСТВЕ НАШЕМ, ЯКО ПОТОЦЫ ВОДНИИ,/ КРОВЬ СВЯТЫХ НОВОМУЧЕНИК ПРОЛИЯСЯ,/ ОБАЧЕ СМОТРЕНИЕМ БОЖИИМ/ СИЯ СЕМЯ ЯВИСЯ, / ИЗ НЕГОЖЕ ПРОЗЯБЕ БЛАГОСЕННОЛИСТВЕННОЕ ДРЕВО// РУСИ ПРАВОСЛАВНЫЯ.
Тропарь, глас 3:
ДОБРОМУ ЕВАНГЕЛЬСКОМУ ПАСТЫРЮ ПОДРАЖАЯ,/ ДЕРЗНОВЕННО ВО ДВОР ОВЧИЙ ВШЕЛ ЕСИ, СВЯЩЕННОМУЧЕНИЧЕ АЛЕКСАНДРЕ,/ И, СВОЯ ОВЦЫ ГЛАШАЯ ПО ИМЕНИ,/ ВО ОГРАДЕ ЦЕРКОВНЕЙ ТЫЯ НЕВРИДИМО УПАСЛ ЕСИ,/ ЛОВИТЕЛЬСТВУ БЕЗБОЖНЫХ ПРЕГРАЖДАЯ ПУТЬ,/ КРОВИЮ ОБАГРИВСЯ,// МУЧЕНИК И ИСПОВЕДНИК ХРИСТОВ ЯВИЛСЯ ЕСИ.
НА УТРЕНИ
Канон
Песнь 1
СВЯЩЕННОМУЧЕНИЧЕ СТРАДАЛЬЧЕ АЛЕКСАНДРЕ,/ ПУТЕМ БЛАГОЧЕСТИЯ ШЕСТВУЯ НЕУКЛОННО,/ ТЕЧЕНИЕМ КРОВЕ БЕЗБОЖИЕ ЛЬСТИВОЕ ИСТИННО ПОТОПИЛ ЕСИ, /И НЫНЕ СПАСАЕШИ ПОДВИГИ ТВОЯ ВО ХРАМЕ СЕМ ХВАЛЯЩИХ,/ И ЧЕСТНУЮ ПАМЯТЬ ТВОЮ,/ БЛАЖЕННЕ, ТОРЖЕСТВУЮЩИХ.
Песнь 3
УКРАШЕН БАГРЯНИЦЕЮ,/ ОБАГРЕННУЮ ОТ СВЯЩЕННИЧЕСКИХ, МУЧЕНИЧЕ АЛЕКСАНДРЕ, ИСТИННО КРОВЕЙ ТВОИХ,/ ЦАРЮ ВЕКОВ, ВЕНЦЕНОСЕЦ, БЛАЖЕННЕ, ПРЕДСТОИШИ.
Песнь 4
АЛЕКСАНДРОВЫ СТРАСТИ ВОСХВАЛИМ,/ ТЕМНИЧНЫЯ УЗЫ, БОЛЕЗНИ И СМЕРТЬ ВОСПЕСНОСЛОВИМ,/ ЛЮБОВИЮ ЕГО УБЛАЖИМ, ВЕРНИИ, И ВОЗОПИИМ:/ ПРОСИ ДАРОВАТИ НАМ МИР И ВЕЛИЮ МИЛОСТЬ.
Песнь 5
ВСЕУСЕРДНО, СВЯЩЕННОМУЧЕНИЧЕ АЛЕКСАНДРЕ, ВОЗЛЮБИВ ХРИСТА БОГА НАШЕГО,/ ПОСТРАДАЛ ЕСИ И ТЕМ ДЕРЖАВУ ПОГУБИЛ ВРАЖИЮ, БЕЗБОЖНУЮ.
Песнь 6
ВЕНЕЦ ПРИЯЛ ЕСИ ЯВЕ НЕУВЯДАЕМЫЙ, И СЛАВУ ВЕЧНУЮ И ВЕСЕЛИЕ,/ И РАДОСТЬ, КОНЦА НЕИМУЩУЮ, И ЦАРСТВО НЕБЕСНОЕ,/ БОГОМУДРЕ АЛЕКСАНДРЕ, СО СТРАДАВШИМИ С ТОБОЮ НОВОМУЧЕНИКАМИ МОСКОВСКИМИ,/ С НИМИЖЕ ПОМИНАЙ НАС КО ГОСПОДУ.
Кондак, гл. 4:
ПРЕСВИТЕРА МОСКОВСКАГО АЛЕКСАНДРА ДНЕСЬ ПРОСЛАВИМ,/ ПАМЯТЬ ЕГО БЛАГОЧЕСТНО ПОЧИТАЮЩЕ,/ ТОЙ БО ОБРАЗОМ ПРАВЕДНАГО ЖИТИЯ И ВЕРНОСТИ ХРИСТУ ДАЖЕ ДО СМЕРТИ/ К ЖИЗНИ ВЕЧНОЙ ПУТЕВОДИЛ ЕСИ/ И НЫНЕ ВЕРОЮ ВО ХРАМ СЕЙ ПРИТЕКАЮЩИМ НАДЕЖДУ ЖИЗНИ ВЕЧНЫЯ ДАРУЕТ.
Песнь 7
МУЖЕСТВЕНЕН ЯВИЛСЯ ЕСИ НА БЕЗБОЖНОЕ НЕЧЕСТИЕ СВЯЩЕННОМУЧЕНИЧЕ АЛЕКСАНДРЕ, КРЕПОСТИЮ ГОСПОДНЕЮ,/ И НЫНЕ С ЛИКИ СВЯТЫХ ПРЕБЫВАЯ, ВОПИЕШИ:/ ОТЦЕВ НАШИХ БОЖЕ БЛАГОСЛОВЕН ЕСИ.
Песнь 8
МУЧЕНИЙ НЕ ПОКОЛЕБАШЕ ТВОЕЯ ДУШИ ТРЕВОЛНЕНИЕ,/ НИ ЗАТВОРЕНИЕ ВО МРАЧНЕЙ ТЕМНИЦЕ СОКРЫВАЮЩЕЙ ТЯ,/ СЛАВНЫЙ АЛЕКСАНДРЕ,/ ПОСТРАДАВ, К БОГУ ПРИВЕЛ ЕСИ МНОЖЕСТВО ПОЮЩИХ:/ БЛАГОСЛОВИТЕ, ВСЯ ДЕЛА ГОСПОДНЯ, ГОСПОДА.
Песнь 9
ЗЕМЛЮ РУССКУЮ ГУБЯЩЕГО БЕЗБОЖНАГО ВРАГА, ПОСРАМИЛ ЕСИ,/ И СОБЕСЕДНИК ЯВИЛСЯ АРХАНГЕЛОВ И АНГЕЛОВ,/ КУПНОЖИТЕЛЬ ПРОРОКОВ ЖЕ, АПОСТОЛОВ И СВЯТИТЕЛЕЙ,/ МУЧЕНИКОВ РАВНОСТАТЕН,/ С НИМИЖЕ О НАС, ЧТУЩИХ ТЯ, ОТЧЕ АЛЕКСАНДРЕ, МОЛИ ЧЕЛОВЕКОЛЮБЦА.
Светилен, глас:
ВО СВЯЩЕНСТВЕ БЛАГОЧЕСТНО ПОЖИВ/ И МУЧЕНИЯ ПУТЬ ПРОШЕД,/ МУЧИТЕЛЕЙ ПОСРАМИЛ ЕСИ,/ ТЕМЖЕ ПОЧИТАЮЩЕ ТЯ, ТАКО ВОПИЕМ ТИ:/ ОТ БЕД ИЗБАВИ НЫ ПРИСНО ТВОИМИ МОЛЬБАМИ,// ОТЧЕ НАШ АЛЕКСАНДРЕ.
На хвалитех стихира, глас 5:
ТЕЛО МУКАМ ПРЕДАВ, СВЯЩЕННОМУЧЕНИЧЕ АЛЕКСАНДРЕ,/ ДУШУ ТВОЮ НЕБЛАЗНЕННО СОБЛЮЛ ЕСИ:/ ЖЕРТВУ НЕПОРОЧНУ ВЛАДЫЦЕ, ТЯ САМАГО, ПРИНЕСЛ ЕСИ, ВСЕЧЕСТНЕ.
Молитва
СВЯТЫЙ УГОДНИЧЕ БОЖИЙ, СВЯЩЕННОМУЧЕНИЧЕ АЛЕКСАНДРЕ! ПРИЗРИ МИЛОСТИВНО НА УСЕРДНУЮ МОЛИТВУ НАС, ГРЕШНЫХ, И ТВОИМ БЛАГОМОЩНЫМ ПРЕДСТАТЕЛЬСТВОМ ИСПРОСИ НАМ У ГОСПОДА ПРОЩЕНИЕ СОГРЕШЕНИЙ НАШИХ, ПРЕСПЕЯНИЕ В ВЕРЕ И БЛАГОЧЕСТИИ И ОГРАЖДЕНИЕ ОТ КОЗНЕЙ ДИАВОЛЬСКИХ. МОЛИ ГОСПОДА, ДА ХРАНИТ В ЗДРАВИИ И БЛАГОПОЛУЧИИ ВЕРНЫХ ЛЮДЕЙ СВОИХ, ДА ПОДАСТ СТРАНЕ НАШЕЙ МИР И ТИШИНУ, ЦЕРКОВЬ ЖЕ СВЯТУЮ ОТ РАСКОЛОВ И ЕРЕСЕЙ ДА СОХРАНИТ, ДА СПОДОБИТ НАС ВСЕХ, ПО ХРИСТИАНСКОЙ КОНЧИНЕ, ПОЛУЧИТИ НЕБЕСНОЕ ЦАРСТВИЕ, ИДЕЖЕ ВСИ ПРАВЕДНИИ ВМЕСТЕ С ТОБОЮ ВЕЧНО СЛАВЯТ ОТЦА, И СЫНА, И СВЯТАГО ДУХА. АМИНЬ.