СЛУЖБА
СВЯЩЕННОМУЧЕНИКУ ПРОТОИЕРЕЮ СЕРГИЮ ГОЛОЩАПОВУ
ЕГОЖЕ ПАМЯТЬ 6/19 ДЕКАБРЯ
 

 

НА ВЕЛИЦЕЙ ВЕЧЕРНИ

На Господи, воззвах:  стихиры, глас 8:

ЗЕМЛЯ РУССКАЯ / ЦЕРКВИ СВОЕЙ СВЯЩЕННОМУЧЕНИКА НОВАГО ЯВИ, / ИЖЕ ВЕРУ ХРИСТОВУ В НАСЛЕДИЕ МНОГОЦЕННОЕ ВОСПРИЯВ, / СОХРАНИЛ Ю В ЖИТИИ И СТРАДАНИИ СВОЕМ, / ТОГО РАДИ ПАМЯТЬ ЕГО ПРАЗДНУЕМ, ТОРЖЕСТВУЮЩЕ.

МУЧЕНИЧЕ СТРАДАЛЬЧЕ СЕРГИЕ, / ХРИСТА БОЖИЮ МУДРОСТЬ ИЗМЛАДА ВОЗЛЮБИВ, / БОЖЕСТВЕННЫМ БЫВ УМУДРЕН ПРОСВЕЩЕНИЕМ, / БОГОМУДРИЮ НАУЧАЕШИ НАС БЛАГОДАТНО./ И ПРЕШЕЛ ЕСИ К ПРЕМИРНЫМ, / СТРАДАЛЬЧЕСКОЮ КРОВИЮ ОМЫВСЯ, БОГОБЛАЖЕННЕ.

Премудрости Соломонова чтение (глава 4):

ПРАВЕДНИК, АЩЕ ПОСТИГНЕТ СКОНЧАТИСЯ, В ПОКОИ БУДЕТ./ СТАРОСТЬ БО ЧЕСТНА НЕ МНОГОЛЕТНА, НИЖЕ В ЧИСЛЕ ЛЕТ ИСЧИТАЕТСЯ./ СЕДИНА ЖЕ ЕСТЬ МУДРОСТЬ ЧЕЛОВЕКОМ, И ВОЗРАСТ СТАРОСТИ ЖИТИЕ НЕСКВЕРНОЕ./ БЛАГОУГОДЕН БОГОВИ БЫВ, ВОЗЛЮБЛЕН БЫСТЬ, И ЖИВЫЙ ПОСРЕДЕ ГРЕШНИК ПРЕДСТАВЛЕН БЫСТЬ./ ВОСХИЩЕН БЫСТЬ, ДА НЕ ЗЛОБА ИЗМЕНИТ РАЗУМА ЕГО, ИЛИ ЛЕСТЬ ПРЕЛЬСТИТ ДУШУ ЕГО./ РАЧЕНИЕ БО ЗЛОБЫ ПОМРАЧАЕТ ДОБРАЯ, И ПАРЕНИЕ ПОХОТИ ПРЕМЕНЯЕТ УМ НЕЗЛОБИВ./ СКОНЧАВСЯ ВМАЛЕ, ИСПОЛНИ ЛЕТА ДОЛГА. УГОДНА БО БЕ ГОСПОДЕВИ ДУША ЕГО, СЕГО РАДИ ПОТЩАСЯ ОТ СРЕДЫ ЛУКАВСТВИЯ./ ЛЮДИЕ ЖЕ ВИДЕВШЕ И НЕ РАЗУМЕВШЕ, НИЖЕ ПОЛОЖШЕ В ПОМЫШЛЕНИИ ТАКОВОЕ./ ЯКО БЛАГОДАТЬ И МИЛОСТЬ В ПРЕПОДОБНЫХ ЕГО, И ПОСЕЩЕНИЕ ВО ИЗБРАННЫХ ЕГО.

На литии стихира, глас 5.  Подобен: Радуйся:

РАДУЙСЯ, СВЯЩЕННАЯ ГЛАВО, / ПРЕЧЕСТНЫЙ СОСУДЕ СВЯТАГО ДУХА, / ХРАМА НАШЕГО ПОХВАЛО, ЦЕРКВЕ УКРАШЕНИЕ, / ПРЕСВИТЕРОВ УДОБРЕНИЕ, МУЧЕНИКОВ ЛЕПОТО, / БОГОСЛОВЕ ВСЕХВАЛЬНЫЙ, / МИРЛИКИЙСКАГО СВЯТИТЕЛЯ ПОЧИТАТЕЛЮ, / С НИМЖЕ, ПРЕДСТОЯ ВСЕХ ЦАРЮ, СВЯЩЕННОМУЧЕНИЧЕ СЕРГИЕ, / МОЛИСЯ ДАРОВАТИ НАМ ВЕЛИЮ МИЛОСТЬ.

На стиховне стихира, глас 4.

ЯКО СВЕТОЗАРНАЯ ЗВЕЗДА, / ВОЗСИЯЛ ЕСИ В ХРАМЕ СЕМ, / СТРАДАЛЬЧЕ СЕРГИЕ, / ОЗАРЯЯ БОЖЕСТВЕННЫМИ СЛОВЕСЫ И ДЕЯНИИ / ВО МРАЦЕ БЕЗБОЖИЯ СУЩИЯ, / И ЯКО ДОБРЫЙ ПАСТЫРЬ ДУШУ СВОЮ ЗА ОВЦЫ ПОЛОЖИЛ ЕСИ. / НЫНЕ, СО ХРИСТОМ ЦАРСТВУЮЩИ, / МОЛИ О СПАСЕНИИ ДУШ НАШИХ.

Тропарь, глас 3:

            В ЛЮТУЮ ГОДИНУ ГОНЕНИЙ БЛАГОДАТЬ СВЯЩЕНСТВА ПРИЕМ, / ПРЕБЛАЖЕННЕ ОТЧЕ СЕРГИЕ, / ИЕРЕЙ БОГА ВЫШНЯГО ЯВИЛСЯ ЕСИ, / БОГОСЛОВ ЖЕ И БЛАГОЧЕСТИЯ СВЕТЛЫЙ ПРОПОВЕДНИК, / НЫНЕ ЯКО НОВОМУЧЕНИК И ИСПОВЕДНИК ПРЕДСТОИШИ ХРИСТУ, / ЕГОЖЕ МОЛИ ХРАМ СЕЙ СОХРАНИТИ / И СПАСТИ ДУШИ НАША.

На утрени по стихословии седален:

БЛАГОДАТИ И СИЛЫ БОЖЕСТВЕННЫЯ ИСПОЛНЕН, / БЛАГОЧЕСТИЕ НЕПРЕКЛОННОЕ ДЕРЖАЛ ЕСИ, СВЯЩЕННЕ СЕРГИЕ, / И МУЧЕНИЧЕСКУЮ ПОКАЗАЛ ЕСИ ТВЕРДОСТЬ, ЗА ХРИСТА ПОСТРАДАВ, РАДУЯСЯ, / У НЕГОЖЕ ПРОСИ НАМ МИРА И ВЕЛИЯ МИЛОСТИ.

По полиелее седален:

ВЕСЕЛИСЯ, СЛАВНЕЙШИЙ ГРАД МОСКВА, / РАДУЙСЯ СОБОРЕ ВЕРНЫХ, / СВЕТЛО ТОРЖЕСТВУЮЩЕ В ПАМЯТИ СЕРГИЯ СВЯЩЕННОМУЧЕНИКА, / ПРЕСВИТЕРА ХРАМА НИКОЛЬСКАГО ПРЕИЗРЯДНАГО, / БОГОСЛОВА БОГОМУДРАГО, / ПРОПОВЕДНИКА  НЕ ТОЧИЮ СЛОВЕСАМИ ПИСАНИЙ, НО И НЕЛОЖНЫМ ЖИТИЕМ СВОИМ, / СТРАДАНИЕМ БОГА ПРОСЛАВИВШАГО / И МОЛЯЩАГОСЯ НЫНЕ О ДУШАХ НАШИХ.

НА УТРЕНИ



Канон егоже краегранесие: Святому Сергию пою:

Песнь 1

Святый священномучениче Сергие, моли Бога о нас.

СВЯЩЕННОМУЧЕНИКА НОВАГО СЕРГИЯ, / ЕГОЖЕ ПРИЯЛ ЕСИ В НЕБЕСНЫЯ КРОВЫ, / ХРИСТЕ ПАСТЫРЕНАЧАЛЬНИЧЕ, / ВОСПЕТИ ДОСТОЙНО СПОДОБИ, / ЯКО ПРОСЛАВИСЯ.

ВОЗЛЮБИЛ ЕСИ ИЗ МЛАДА СЛУЖБУ ЦЕРКОВНУЮ, ДУШУ ЧИСТУЮ ЗАКОНУ БОЖИЮ ПОВИНУВ, И РАЗУМ, В СЛОВЕСА ПИСАНИЙ, ВПЕРИВ, СВЯЩЕННОМУЧЕНИЧЕ СЕРГИЕ, СИХ ДЕЙСТВО НЕПРАЗДНО В ТЕБЕ ЯВИСЯ, ЯКО ПРОСЛАВИСЯ.

 

Песнь 3

ЯКО ПИЩА ЖЕ И ПИТИЕ БЫСТЬ ТИ ЗАКОН ХРИСТОВ, ЕГОЖЕ РАЗУМЕТИ ВО МНОГИХ ТРУДАХ НЕЛЕНОСТНО ПОТЩИЛСЯ ЕСИ, В НЕМЖЕ НАУЧЕН, ЛИШЕНИЯ, БОЛЕЗНИ И СКОРБИ, НИЩЕТУ И ГОНЕНИЯ КРЕСТОНОСЯ ТЕРПЕЛИВНО ВО ЮДОЛИ ПЛАЧЕВНЕЙ, ВЗЫВАЛ ЕСИ: СВЯТ ЕСИ, ГОСПОДИ.

ТАЛАНТ ТИ ВВЕРЕННЫЙ УМНОЖИЛ ЕСИ, В КУПЛЮ КРОВЬ ТРУДОВ ТВОИХ ДАЯ И ДУХ ТЕРПЕНИЯ ПРИЕМЛЯ, СЕГО РАДИ И ОТ БОГА МУЧЕНИЧЕСКИМ ВЕНЦЕМ ОБОГАТИВСЯ, ВСЯ ПРЕТЕРПЕВЫЙ ДО КОНЦА, БИСЕР ЦАРСТВИЯ НЕБЕСНАГО ОБРЕЛ ЕСИ.

Седален:

 

СЕ ХРАМ ПРЕСВЕТЕЛ И МЕСТО СВЯЩЕНИЯ СВЯТЫЯ ТРОИЦЫ, ИДЕЖЕ ЧЕСТНЫЙ ПОКРОВ МАТЕРЕ БОЖИЯ ПРЕБЫВАЕТ, ПРЕДСТАТЕЛЬСТВО АПОСТОЛОВ ПЕРВОВЕРХОВНЫХ И СВЯТИТЕЛЯ НИКОЛАЯ МИР ЛИКИЙСКИХ ЧУДОТВОРЦА НА ВЕРНЫХ ИЗЛИВАЕТСЯ. СТРАХОМ ПРИСТУПАЕМ, СПАСЕНИЕ ВЗЫСКУЯ, ХОДАТАЯ ТЕПЛА ИМЕЮЩИ, СВЯЩЕННОМУЧЕНИКА СЕРГИЯ.

 

Песнь 4

О БОЖЕСТВЕННЕЙ СТРАЖЕ ПОРЕВНОВАЛ ЕСИ, СВЯЩЕННОМУЧЕНИЧЕ СЕРГИЕ; ДА СОЛЬ ЗЕМЛИ НЕ ОБУЯЕТ, ВЕРА ПРАВОСЛАВНАЯ В НАРОДЕ ТВОЕМ, БУЙСТВУ БЕЗБОЖНОМУ СВИРЕПЕЮЩУ; ИСПОВЕДНИКА ДРУГАГО  ПАТРИАРХА ТИХОНА БЛАГОСЛОВЕНИЕ ПРИЕМ, БЛАГОДАТЬ СВЯЩЕНСТВА, ЯКО ИГО БЛАГОЕ НА РАМЕНА СВОЯ ВОЗЛОЖИ И ПУТЬ ПРАВ МНОГИМ ЯВИШАСЯ.

МОСКОВСКОЙ НИВЫ ДУХОВНОЙ ДЕЛАТЕЛЬ УСЕРДНЫЙ И ПАСТЫРЬ ДОБРЫЙ ОВЦАМ ЯВИЛСЯ ЕСИ, СВЯЩЕННОМУЧЕНИЧЕ СЕРГИЕ, ЖЕСТОКИХ ГОНЕНИЙ НЕ УБОЯВСЯ, АПОСТОЛЬСКИ ХРИСТА  ПРОПОВЕДАЛ ЕСИ ВО ТЬМЕ ОТСТУПЛЕНИЯ, ЕМУЖЕ ВЗЫВАЛ ЕСИ: СЛАВА СИЛЕ ТВОЕЙ, ГОСПОДИ.

Песнь 5

УНЫНИЯ ДУХ ЛЮТЫЙ ПОБЕДИЛ ЕСИ ВО МНОЖЕСТВЕ ЗЛОСТРАДАНИЙ ТВОИХ, СВЯЩЕННОМУЧЕНИЧЕ СЕРГИЕ, ЛЮБОВЬ ИМЕЯ В СЕБЕ И МУЖЕСТВО НЕПОКОЛЕБЛЕМО, В НОЩИ ЛЕСТНЕЙ ОДЕРЖИМЫЯ К СВЕТУ НАСТАВЛЯЛ ЕСИ И МЗДУ ПРИЯЛ ЕСИ, ЕЖЕ СКОНЧАТИСЯ МУЧЕНИЧЕСКИ.

СВЯТОМУ ПОДВИГУ УГОТОВИЛСЯ ЕСИ И НЕ СМУТИЛСЯ ВО ИСКУШЕНИЯХ, ПОДВИГОПОЛОЖНИКУ УКРЕПЛЯЮЩУ ТЯ, УЗЫ И ИЗГНАНИЕ В ЗЕМЛИ СЕВЕРНЕЙ ТЕРПЯ, ГЛАДОМ ЖЕ И СТУЖЕЮ, И МНОГИМИ ЛИШЕНИЯМИ ТОМИМ, ХРИСТА НЕ ПРЕСТАЛ ЕСИ СЛАВОСЛОВИТИ ЧЕЛОВЕКОЛЮБЦА.

 

Песнь 6

ЕДИН ОТ НОВОМУЧЕНИК БЫВ, СТРАДАЛЬЧЕ ОТЧЕ СЕРГИЕ, КРОПЛЕНИИ ИЗЛИЯННЫХ КРОВЕЙ СЕБЕ ОЧЕРВЛЕНИВША РИЗЫ И СВЕТЛО ОДЕЯВШЕСЯ ЦАРЮ ВЕКОВ ПРЕДСТОИШИ, МОЛЯЩЕСЯ О НАС СО ВСЕМИ ВЫШНЯМИ СИЛАМИ.

РАНЫ СОУЗНИКОВ ОМЫВАЯ, ОЖЕСТОЧЕННЫЯ ДУШИ ВЕЛИКОЙ ВЕРЕ ПРАВОЙ НАУЧАЛ ЕСИ В ДУСЕ БОЖЕСТВЕННОМ И В КЛЕТИ СЕРДЦА СВОЕГО НИКОГДАЖЕ РАЗЛУЧИЛСЯ ЕСИ ЛЮБВИ БОЖИЕЙ.

 

КОНДАК, ГЛАС 5.      

 

НАСТА ДНЕСЬ СЛАВНАЯ ПАМЯТЬ ТВОЯ, / СВЯЩЕННОМУЧЕНИЧЕ СЕРГИЕ, / СОЗЫВАЮЩИ НАС К БЛАГОХВАЛЕНИЮ ПАСТЫРСКИХ ТРУДОВ ТВОИХ./ ТЫ ЖЕ ПРЕДСТАТЕЛЬСТВОМ СВЯТИТЕЛЯ МИРЛИКИЙСКАГО ХРАНИМЫЙ, / ПАМЯТЬ ЕГО МУЧЕНИЧЕСКОЙ КОНЧИНОЙ ЗАСВИДЕТЕЛЬСТВОВАЛ ЕСИ, / С НИМ ЖЕ, ПРЕДСТОЯ ХРИСТУ, / МОЛИСЯ ДАРОВАТИ НАМ ВЕЛИЮ МИЛОСТЬ.

Песнь 7

ГОСПОДА БОГА ВО ПЛОТИ ПРИШЕДША ПРОСЛАВИЛ ЕСИ, ЖЕРТВУ СЛОВЕСНУЮ ТРОИЦЕ ПРЕСВЯТЕЙ ПРИНОСЯ, ХРИСТУ СОРАСПЯВСЯ, СОПРОСЛАВИЛСЯ ЕСИ С НИМ, ПОЮЩЕ: ОТЕЦ НАШИХ БОЖЕ, БЛАГОСЛОВЕН ЕСИ.

ИСТОЩИВШАГО СЕБЕ НАС РАДИ ПРОРАЗСУЖДАЯ ВОПЛОЩЕНИЕ, ХРИСТА ИСПОВЕДУЯ ПРОТИВУ ВРАГОМ, ПРЕСЛАВНЕ СЕРГИЕ, К СВЕТУ БЛАГОРАЗУМИЯ МНОЖЕСТВО СПАСАЕМЫХ НАСТАВИЛ  ЕСИ, ВОПИТИ: ОТЕЦ НАШИХ БОЖЕ, БЛАГОСЛОВЕН ЕСИ.

Песнь 8

ЮНИЦЫ БОЖЕСТВЕННЫЯ И ВЛАДЫЧИЦЫ ПРЕЧИСТЫЯ ПОКРОВУ ПРИТЕКАЮЩИИ, СОМОЛИТВЕННИКА ИМЕЕМ ТЯ, ПРИСНАГО НАМ ХОДАТАЯ, СВЯЩЕННОМУЧЕНИЧЕ СЕРГИЕ, НЕВИДИМО ДНЕСЬ ПРЕДСТОЯЩА В ЦЕРКВИ.

ПРЕДСТАТЕЛЬСТВОМ СВЯТИТЕЛЯ МИРЛИКИЙСКАГО ХРАНИМЫЙ, ИСПЕРВА В ХРАМЕ ЕГО В ПОКРОВСКОМ ПОСЛУЖИВШИ, В ДЕНЬ ПРОСЛАВЛЕНИЯ ЕГО ПОСТРАДАТИ ЗА ХРИСТА СПОДОБИЛСЯ ЕСИ, СЕГО РАДИ ВКУПЕ ВОПИЮЩЕ: СВЯЩЕННИЦЫ, ВОСПОЙТЕ, ЛЮДИЕ, ПРЕВОЗНОСИТЕ ВО ВСЯ ВЕКИ.

Песнь 9

ОДЕЖДЫ СВЯЩЕННЫЯ, ЖЕРТВЫ БЕЗКРОВНЫЯ СОВЕРШАЯ, НЕ ПОСРАМИЛ ЕСИ,  ТЕМЖЕ И В МУЧЕНИЧЕСКУЮ БАГРЯНИЦУ ОДЕЯВСЯ, САМ БЫВ ЖЕРТВА ХРИСТУ, СЛАДОСТИ БОЖЕСТВЕННЫЯ НАСЛАЖДАЕШИСЯ ВО ВЕКИ.

ЮЖЕ ЗРИМ, НЕБОШЕСТВЕННУЮ ТВОЮ СТЕЗЮ, СВЯЩЕННОМУЧЕНИЧЕ СЕРГИЕ, ЕГДА СТАЛ ЕСИ ПРОТИВУ ВРАГОВ, ХРИСТА ИСПОВЕДУЯ, И, ВЕДЕН БЫВ НА ЗАКОЛЕНИЕ, ЗЕМЛЮ РУССКУЮ ОСВЯТИЛ ЕСИ СВОЕЮ КРОВИЮ.

Светилен:

ТВОЯ, СЕРГИЕ, СВЯЩЕННАЯ ПАМЯТЬ / СВЕТЛЫМИ ЗАРЯМИ  ДАРОВ ДУХА ОЗАРЯЕТ ВЕРНЫХ ИСПОЛНЕНИЕ, / ЮЖЕ ПРАЗДНУЮЩИЯ ПРИСЕЩАЙ, СВЯЩЕННОМУЧЕНИЧЕ, / ОТ МРАКА ГРЕХОВНАГО ИЗЫМАЯ НАС ТВОИМ ПРЕДСТАТЕЛЬСТВОМ.

На хвалитех стихиры, глас 2:

 

ПРИИДИТЕ, МУЧЕНИКОЛЮБЦЫ, / ВОСПОИМ СЕРГИЯ ДОСТОБЛАЖЕННАГО, / СТРАДАЛЬЦЕВ ПОХВАЛУ, ПРЕСВИТЕРОВ МОСКОВСКИХ УКРАШЕНИЕ / И К БОГУ МОЛИТВЕННИКА НЕУСЫПНА / О НАС, ЧТУЩИХ СВЯТУЮ ПАМЯТЬ ЕГО.

ЖИТИЯ СВЕТЛОСТИЮ УКРАШЕН / И КРАСЕН В СВЯЩЕНСТВЕ БЫВ, / В КРАСНЫЯ ЧЕРТОГИ НА НЕБЕСИ ВСЕЛИЛСЯ ЕСИ, / БОЖЕСТВЕННОЮ СЛАВОЮ, ЯКО РИЗОЮ, ОДЕЯН БОГОЛЕПНО, / СЕГО РАДИ ХРАМ СЕЙ ОТ БЕД ИЗБАВИ МОЛИТВАМИ / ТВОИМИ, СЕРГИЕ, ОТЧЕ НАШ.

Прокимен, глас 7: Восхвалятся преподобнии во славе / и возрадуются на ложах своих. Стих: Воспойте Господеви песнь нову, хваление Его в церкви преподобных.

Апостол ко Евреем, зачало 334. Аллилуия, глас 2: Священницы Твои облекутся в правду, и преподобнии Твои возрадуются. Стих: Честна пред Господем смерть преподобных Его. Евангелие от Луки, зачало 67. Причастен: В память вечную будет праведник.

МОЛИТВА

О СВЯТЫЙ  СВЯЩЕННОМУЧЕНИЧЕ ОТЧЕ НАШ СЕРГИЕ, ХРАМА НАШЕГО СЛАВО И РАДОВАНИЕ ВЕЛИКОЕ!
В ПРЕСЛАВНЫЙ И ПРАЗДНСТВЕННЫЙ ДЕНЬ СЕЙ, ПРИИМИ СМИРЕННАЯ И ТЕПЛАЯ МОЛЕНИЯ НАША. ДНЕСЬ ЗРИМ ИСПОЛНИВШИЙСЯ ГЛАГОЛ ГОСПОДЕНЬ: ПРОСЛАВЛЯЮЩИЯ МЯ ПРОСЛАВЛЮ. СЕ БО ВО ДНИ ЗЕМНАГО ЖИТИЯ ТВОЕГО НИЧЕСОЖЕ ИСКАЛ ЕСИ, ТОЧИЮ ЕЖЕ ВОЛЮ БОЖИЮ ИСПОЛНЯТИ И ЧАДА ПАСТВЫ ТВОЕЯ ЧРЕЗ ПОСЛУШАНИЕ ЦЕРКОВНОЕ УПРАВИТИ ВО СПАСЕНИЕ. ЕГДА ЖЕ ПРИСПЕ ВРЕМЯ ЗЛОЧЕСТИВАГО ГОНЕНИЯ ЗА ВЕРУ ХРИСТОВУ, МНОГИЕ ТРУДЫ, СКОРБИ, БОЛЕЗНИ, УЗЫ ТЕМНИЧНЫЯ И САМУ СМЕРТЬ ПРИЯЛ ЕСИ. СЕГО РАДИ, ЯКОЖЕ ИЗБРАННИКА БОЖИЯ ТЯ ВЕДУЩИ, ЦЕРКОВЬ РУССКАЯ ПРОСЛАВИТИ ТЯ ЯКОЖЕ НОВАГО МУЧЕНИКА ЗЕМЛИ НАШЕЯ СПОДОБИСЯ.
О ПРЕДИВНЫЙ СТРАДАЛЬЧЕ, СО УМИЛЕНИЕМ НЫНЕ ВЗЫВАЕМ ТИ: ПРИНЕСИ МОЛИТВУ НАШУ К ВСЕСИЛЬНОМУ БОГУ, И ИСПРОСИ НАМ У БЛАГОСТИ ЕГО ВСЯ ЯЖЕ НА ПОЛЬЗУ ДУШАМ И ТЕЛЕСЕМ НАШИМ, ВЕРУ НЕПОСТЫДНУ, НАДЕЖДУ НЕСУМНЕННУ, ЛЮБОВЬ НЕЛИЦЕМЕРНУ, В ИСКУШЕНИЯХ МУЖЕСТВО, В ЗЛОСТРАДАНИЯХ ТЕРПЕНИЕ, ВО БЛАГОЧЕСТИИ ПРЕСПЕЯНИЕ. ЦЕРКОВЬ  СВЯТУЮ ОТ РАСКОЛОВ И НЕСТРОЕНИЙ СОХРАНИ, ВЕРНЫЯ УКРЕПИ, ЗАБЛУЖДШИЯ НА ПУТЬ ПРАВЫЯ ВЕРЫ ОБРАТИ.  НЕ ЗАБУДИ, УГОДНИЧЕ БОЖИЙ, И СВЯТЫЙ ХРАМ СЕЙ: СОБЛЮДИ ЕГО МОЛИТВАМИ ТВОИМИ ОТ ВСЯКАГО ЗЛА. ПАСТЫРЕМ ЕГО ПОДАЖДЬ ПРЕМУДРОСТЬ, ЧИСТОТУ И ПРАВЕДНОЕ ЖИТИЕ, ЯКОЖЕ И САМ ЗДЕ СИМИ УКРАШАЛСЯ ЕСИ. ВСЕМ ЖЕ ЧАДОМ ЦЕРКОВНЫМ РАДОСТЬ О ГОСПОДЕ ПРИСНУЮ ПОДАЖДЬ: МЛАДЕНЦЫ ВОСПИТАЙ, ЮНЫЯ НАУЧИ, БОЛЯЩИМ И СКОРБЯЩИМ ЗДРАВИЕ ИСПРОСИ. СУЩИМ В ТРУДЕХ ТЕРПЕНИЕ И УПОВАНИЕ ПОСЛИ, БОГАТЫМ СМИРЕННОМУДРИЕ И КО БЛИЖНИМ МИЛОСЕРДИЕ ДАРУЙ.
ЕЙ, СВЯТЧЕ БОЖИЙ, ПОМЯНИ И НАС ПАМЯТЬ ТВОЮ НЫНЕ ТВОРЯЩИХ И СПОДОБИ НАС КОНЧИНУ БЛАГУЮ УЛУЧИТИ И ЦАРСТВИЕ НЕБЕСНОЕ УНАСЛЕДОВАТИ, ДА ПРОСЛАВИМ ДИВНАГО ВО СВЯТЫХ СВОИХ БОГА, ЕМУЖЕ ПОДОБАЕТ ВСЯКАЯ СЛАВА, ЧЕСТЬ И ДЕРЖАВА ВО ВЕКИ ВЕКОВ.